Առաջարկներ

suggest image
Մատչելիության ինքնագնահատման համակարգ

18-09-2019

ՄՈՒՇԵՂ ՀՈՎՍԵՓՅԱՆ

Թեև հաշմանդամություն ունեցող անձանց համար միջավայրի մատչելիության պարտադիր լինելն ամրագրված է օրենքով շուրջ 30 տարի, մշակված են բազմաթիվ իրավական ակտեր, սակայն այն դեռ խորթ է տնտեսվարող սուբյեկտների և հանրությանն այլ ծառայություններ մատուցողների համար։ Մատչելիության պահանջը հաճախ արժանանում է հակազդեցության ցածր իրազեկվածության և որոշ պայմանների անհնարին թվալու պատճառով։ Բարեկարգման շրջանակներում մատչելիության ապահովմանն ուղղված քայլերն էլ հաճախ անարդյունավետ են, քանի որ լայն շրջանակների համար հասանելի չէ մատչելիության շինարարական նորմերի վերաբերյալ տեղեկություններ, այդ թվում՝ ոչ մասնագիտական լեզվով։ 

Ծրագրային առաջարկի նպատակը Երևանում հանրությանը մատուցվող ծառայությունների մատչելիության և հաշմանդամության առումով զգայունության ապահովումն է։ Ծրագրի խնդիրներն են՝

  • ծառայությունների մատչելիության ապահովմանն աջակցելը, 
  • ծառայություն մատուցող ֆիզիկական և իրավաբանական անձանց՝ ծառայությունների մատչելիության վերաբերյալ իրազեկվածության բարձրացումը,
  • մատչելի ծառայություններ մատուցողների խրախուսումը։ 

Ծրագրի արդյունքում կարող է ակնկալվել յուրաքանչյուր տարում ծառայություն մատուցող շուրջ 2000 անձի մասնակցություն գնահատման գործին։

suggest image
Ռոտորային տեսակի ավտոկայանատեղիներ

30-07-2019

ԱՐԵԳ ՄԵՀՐԱԲՅԱՆ

Հարգելի Երևանցիներ, ավտոմեքենաների կայանումը մայրաքաղաքում շատ արդի հարց է, որը օրեցօր բարդանում է բերելով բազմաթիվ անհարմարությունների և վթարային իրավիճակների:

Վերոնշյալ խնդիրը լուծելու նպատակով առաջարկում եմ  կառուցել ռոտորային տեսակի ավտոկայանատեղիներ, որոնք արդեն լայն տարածում ունեն աշխարհում :

Հետևյալ ավտոկայանատեղիների առավելություններն են՝

  • Համակարգի ինքնարժեքի մատչելիություն
  • Արագ մոնտաժում (5 օր)
  • Մոնտաժվող համակարգի համար անհրաժեշտ մինիմալ տարածք
  • Ակնհայտ եկամտաբեր բիզնես 

Կից հղումներով կտեսնեք արդեն գործող ռոտորային տեսակի ավտոկայանատեղիների տեսահոլավակները 

1) ԱՄԷ (SMART PARKING KSA)

https://www.youtube.com/watch?v=HCNf23F-f5E

(Ստորև նույնի օրիգինալ հղումը )

https://www.youtube.com/watch?v=Py6oTbPu2vc

2) Ռուսաստան, ք.Մոսկվա (NISSAN)

https://youtu.be/9YVqGSsfI40?t=86

3) Եգիպտոս

https://www.youtube.com/watch?v=G5iMOIEUhwQ

 

Համակարգի մոտավոր արժեքը պատկերացնելու համար անցնել ստորև կցված հղումով 

https://www.alibaba.com/product-detail/Car-parking-rotary-system_60736172133.html?spm=a2700.7735675.normalList.1.AAtDD9&s=p

suggest image
«Վիրտուալ Երևան» կենտրոն

09-10-2019

ՊԱՎԵԼ ՍԱՐԳՍՅԱՆ

Ժամանակակից թվային աշխարհում վիրտուալ իրականությունը բավականին մեծ դեր է խաղում մեր կյանքում և օրեցօր այն ավելի է զարգանում: Այդ իսկ պատճառով ժամանակակից թվային աշխարհի օրենքները պահանջում են, որպեսզի Երևանը և մեր քաղաքի պատմությունը պատշաճ կերպով ներկայացված լինեն նաև վիրտուալ տիրույթում:


Այդ կապակցությամբ առաջարկում ենք հիմնել «Վիրտուալ Երևան» հարթակը, որը նախատեսված է զարգացնել Երևանում վիրտուալ տուրիզմը և նպաստել կրթական համակարգին: Այն կներառի 3 հիմնական ուղղություն՝


1. Վիրտուալ տուրիզմ
Այս ուղղվածությունը ենթադրում է Երևանի պատմական վայրերի, իրադարձությունների հանրահռչակման ծրագիր, ըստ որի զբոզաշրջիկներին հնարավորություն կընձեռվի ծանոթանալ հին Երևանի փողոցների, պատմամշակութային տարատեսակ վայրերի, պատմական իրադարձությունների և պատմությունների հետ: Այսպիսով, զբոսաշրջիկները ծանոթանալով այս ամենի հետ վիրտուալ տիրույթում, ավելի լավ պատկերացում կկազմեն հին Երևանի և նրա պատմական իրադարձությունների մասին, ինչպես նաև նախատեսվող նոր ծրագրերին։

2. Վիրտուալ կրթություն
Տվյալ ուղղվածությունը հնարավորություն կընձեռի դպրոցում ուսանող երեխաների համար ձևավորել վիրտուալ ուսումնական միջավայր, որը հագեցած կլինի նոր տեխնոլոգիական լուծումներով և կհետաքրքրացնի ուսումնական պրոցեսը: Օրինակ՝ պատմական ակնարկները, Երևանի պատմությունը ավելի մատչելի և գրավիչ ձևով կմատուցվեն երեխաներին վիրտուալ պատկերների միջոցով:


3. Վիրտուալ կրթություն և տուրիզմ
«Վիրտուալ Երևան» հարթակի այս ծրագիրը տուրիզմի և կրթական ուղղվածությունների ինքնատիպ համադրում է, որը նպատակաուղղված է վերականգնել կրթական և պատմական հիշողությունը: Տվյալ ծրագրի շրջանակում ստեղծվելու է մի բջջային հավելված (Mobile Application), որն աշխատելու է նորագույն լրացված իրականության AR տեխնոլոգիայով: Հատուկ բջջային հավելվածի մեկ հպման միջոցով մարդիկ կկարողանան, օրինակ, գտնվելով Կինոմոսկվայի շենքի դիմաց, պատկերավոր տեսնել, թե ինչպիսի տեսք է ունեցել այն 1940-ական թվականներին: Այպիսով, կրթական բջջային հավելվածի միջոցով կներկայացվի պատմական Երևանը՝ ծառայելով թե՛ կրթությունը և թե՛ զբոսաշրջությունը զարգացնելու նպատակին: Այս ծրագիրն ամբողջությամբ պետք է լինի «Վիրտուալ Երևան» հարթակի հիմքի վրա և ցուցադրված լինի կենտրոնում:

suggest image
Ծիրանին նվիրված հուշարձան Երևանում

16-09-2019

ԴԱՎԻԹ ԳԵՎՈՐԳՅԱՆ

Բոլոր հրապարակումներում, զբոսաշրջային ուղեցույցերում և ֆիլմերում ծիրանը գովեստվում է որպես հայկական ամենատիպիկ միրգ, խորհրդանիշ, բրենդ: Անգամ լատինական անվանումներից է՝ Plinus Armeniaca /Հայկական սալոր/: Տեղին է հիշատակել նաև «Ոսկե Ծիրան» միջազգային կինոփառատոնը և այլն: Առաջարկվում է Երևանի կենտրոնում տեղադրել 2-2.5 մետրանոց «Ծիրան» հուշարջան, որը կամրացնի և տեսանելի կդարձնի «Ծիրան» հայկական միրգ-բրենդը: Իսկ մրգերից բրենդը դա հենց ծիրանն է / օրինակ տարածված նուռը, որպես բրենդ բավականին վիճելի է՝ նույն Հունաստանը, Իրանը, Թուրքիան արտադրում են մի քանի հազար անգամ շատ նուռ և ունեն շատ ավելի մեծ թվով սորտեր/: Այսօր ծիրանի հուշարձան տեղադրել են Թուրքիայում և  Տաջիկստանում և բավականին լավ տարածում են այս փաստը /որպես խոշոր արտադրողներ զարգացնում և յուրացնում բրենդը/:Առաջարկվող հուշարձանը կարող է լինել մետաղական կամ հատուկ պլաստիկից, որը հնարավոր է նաև ներքին լուսավորմամբ գույները փոխի՝ կանաչից ծիրանագույն: Այս հուշարձանի ներքևում մեծ տառերով կգրվի «Plinus Armeniaca»: Այս գրվածքը կարելի է հետաքրքիր համակցել «I Love», « Armenia, Apticot» բառերի հետ: Վստահաբար  քաղաքի հյուրերը կուզեն նկարվել նման գեղեցիկ հուշարձանի մոտ և այս հուշարձանը կնպաստի Երևանի զբոսաշրջային հեղինակությանը:

suggest image
«ԵՐԵՎԱՆ» տուֆակերտ հուշաքարի տարածքի վերակառուցման նախագիծ

13-08-2019

ԴԱՎԻԹ ԳԵՎՈՐԳՅԱՆ

Երևան- Սևան M4 մայրուղու «ԵՐԵՎԱՆ» տուֆակերտ հուշաքարի տարածքի վերակառուցման նախագիծ:

Երևան–Սևան մայրուղու վրա Կոտայքի մարզի տարածքում գտնվող տուֆակերտ «ԵՐԵՎԱՆ»  հուշաքարը Երևան քաղաքի այցեքարտն էր ժամանակին և Երևանի զբոսաշրջային գրքույկների առաջին էջերում զետեղվում էր այս խորհրդանշի լուսանկարը։

Առանձնահատուկն այն էր, որ զբոսաշրջիկները նախընտրում էին այս հուշարձանի մոտ նկարվել, «հաստատելու» համար Հայաստան կամ Երևան իրենց այցելությունը, քանի որ «Երևան» գրվածքը բազմալեզու է:  Գրվածքով այլ հավաքական հուշարձան-խորհրդանիշ իրականում չկա:

Ներկայումս այս հուշարձանի շրջակա տարածքը, մեղմ ասած, շատ անմխիար վիճակում է։ Համացանցում անգամ մեկ լուսանկար որևէ անձի կողմից արված դժվար է գտնել:

Տարածքը, ռելյեֆը բավականին նմանացնում է Արցախի «Մենք ենք մեր սարերը» կամ, ժողովրդական լեզվով ասած՝ «տատն ու պապը» հուշարձանը և նորոգումից ու տարածքի բարեկարգումից հետո այս տարածքը կարող է նմանվել հենց «տատ ու պապին» և զբոսաշրջային օրինակելի ճամփեզրային վայր լինել՝ վայել 2800-ամյա մայրաքաղաքին: Շահառուները՝ ՀՀ ազգաբնակչությունը և հյուրերը: Վստահաբար, վերակառուցումից հետո Հուշարձանը կդառնա «պարտադիր» կանգառի և լուսանկարվելու տեղ:

suggest image
Եկեք ավելի անվտանգ դարձնենք մեր երեխաների կյանքը

26-09-2019

ԳԵՆԱԴԻ ԳԱԲՐԻԵԼՅԱՆ

Սկսած մանկապարտեզից և դպրոցից երեխաները մեծահասակների ուղեկցությամբ կամ ինքնուրույն մասնակցում են երթևեկությանը՝ դպրոց կամ տուն գնալիս, էքսկուրսիաներ, թանգարաններ և տարբեր միջոցառումներ այցելելիս:  Մինչդեռ տարբեր պատճառներով վարորդներ միշտ  չէ, որ լավ են տեսնում փողոցը հատող երեխաներին: Այդ պստճառով շատ երկրներում արդեր երկար ժամանակ է, որ օրենքը երեխաներին պարտավորեցնում է կրել լույսը արտացոլող  բաճկոններ:
Այսպիսով երեխաները ստանում են պաշտպանության լրացուցիչ աստիճան, և միևնույն ժամանակ այդ բաճկոնները օգնում են վարորդներին ժամանակին և հեռվից տեսնել վտանգը, ինչպես նաև ճիշտ ժամանակին արձագանքել:
Ծրագրի գաղափարն այն է, որ երեխաներին տրամադրվեն արտացոլող ժապավեններով բաճկոններ:

Նման ակցիան կարող է լինել նախադեպային և հետագայում հնարավոր լինի բաճկոններ տրամադրել Հայաստանի բոլոր դպրոցական և նախադպրոցական հաստատություններին:

suggest image
«Շների Այգի» նախագիծ

11-07-2019

ՄԻՔԱՅԵԼ ԿԻՐԱԿՈՍՅԱՆ

• Շների այգու նպատակն է ստեղծել ցանցապատ հանրային տարածք, որտեղ տարբեր ցեղատեսակի շներն առանց վզկապների կվազվզեն ու կխաղան՝ հաճելիորեն իրենց վրա սևեռելով այգում իրենց հանգիստը վայելող մարդկանց և հատկապես երեխաների ուշադրությունը: 
• Այգու նպատակն է ստեղծել շների հետ երեխաների մտերմության այնպիսի բարենպաստ պայմաններ, որոնց շնորհիվ, բացի շների նկատմամբ նրանց հետաքրքրությունից, կկոտրվի կենդանիների հանդեպ վախի զգացումը ու դրանից բխող տարաբնույթ ագրեսիայի դրսևորումը:
• Շների այգու մի փակ հատվածում կտեղակայվի կորած շների ժամանակավոր կացարան, որտեղ կխնամեն նրանց՝ մինչ շնակորույս տերերի հայտնվելը: 
• Իրականացնելով այս ծրագիրը, մենք կաջակցենք հատկապես բնակարանային պայմաններում շուն պահողներին՝ նրանց տանելու ազատ, բարեկեցիկ, ապահով, խոտային ծածկույթով բնական, մաքուր ընդարձակ միջավայր, որտեղ կպահպանվեն ու կզարգանան բնությունից շներին տրված բնազդները՝ ուժը, վազքի արագությունը, ճարպկությունը...
• Շների այգին կունենա երկու առանձնացված հատված մեծ և փոքր շների համար, ինչպես նաև հատուկ մասնագետներ, ովքեր ոչ միայն կհետևեն այգում տարվող ամենօրյա աշխատանքներին այլ կզբաղվեն շների վարժեցմամբ: 
• Շների այգում կիրականացվեն շնային մրցաշարեր և խաղեր շներին զարգացնեու և տերերին զբաղեցնելու համար, ինչպես նաև կտեղադրվեն մարզվելու զանազան սարքավորումներ, շներին լավագույն մարզավիճակ ապահովելու համար:
• Շների այգու առավելությունն է՝ լինել միակը տարածաշրջանում, ունենալով հարմարավետ և ապահով միջավայր, շների ժամանց և տարաբնույթ միջոցառումներ կազմակերպելու համար:
• Իրականացնելով այս ծրագիրը, մենք, ի ուրախություն շնատերերի, ոչ միայն կապահովենք բարեկեցիկ, ապահով, մաքուր և օրինակելի միջավայր իրենց սիրելի շների համար, այլև այդպիսով տուրիզմի զարգացման ևս մի խթան կհանդիսանանք: 
• Մենք դիտարկել ենք կանաչապատ տարածք՝ Դավիթաշեն համայնքում գտնվող այգու վերջնամասում, որն անհրաժեշտ է ցանկապատել՝ շների առօրյան ավելի հարմարավետ և բարեկեցիկ դարձնելու համար: